Suku Saelari, hanesan fatin akontese insidente violénsia iha loron 15 Janeiru entre membru PNTL Eskuadra Laga ho suspeitu eis grupu Konsellu Revolusaun Maubere (KRM) ne’ebé lidera husi eis Komandante, Paulino Gama alias Mauk Moruk. Husi insidente violénsia ne’e, membru KRM kaer membru PNTL na’in 2, sunu karreta Polísia ida no hadau mós pistola rua husi PNTL. Membru PNTL na’in 2 sira husik fila fali iha loron tuir mai. Governu ezije hodi eis Lider no membru KRM atu entrega a’an no responsabiliza ba sira nia asaun. Komandu Operasaun Konjunta (KOK) ne’ebé envolve PNTL no Falintil-FDTL agora daudaun halo hela operasaun iha area Saelari no fatin seluk ne’ebé besik. Parte seguransa mós halo pasa revista ba transporte sira hodi buka tuir eis lider no eis membru KRM. To’o agora iha ona ema na’in 11 maka identifika hanesan autór iha akontesimentu ne’e no detein provizoriamente iha Prizaun Becora Dili.
Belun kontinua halo monitorizasaun situasaun iha Saelari ho vizita direta iha loron 23-24 Janeiru. Iha vizita nee hatudu komunidade ne’ebé afeta diretamente husi akontesimentu loron 15 Janeiru liu ba no sente komunidade sira moris iha situasaun deskonfia ba malu. Download Alerta kompletu iha ne’e.
Nota: Publikasaun ida ne’e ho apoiu husi Povu Amerikanu liu husi USAID. Vizaun ka opiniaun ne’ebé espresa husi iha publikasaun ida ne’e, la refleta vizaun husi Ajénsia Estadus Unidus ba Dezenvolvimentu Internasionál (USAID) ka Governu Estadus Unidus Amérika nian.